目錄
網站小編
經由 on 1月 26, 2018
58 閱讀
據東網報道,呢幾日各國政經巨頭聚首瑞士達沃斯世界經濟論壇,見咁人齊,國際金融大鱷索羅斯發表演說,狂插Google同Facebook(Fb),話佢哋扮晒自由創新,實質行徑壟斷,威脅社會,索羅斯仲批佢哋「死期快到」!。
索羅斯話,成日有人話啲巨企剝削天然資源,實質有啲科技平台亦剝削緊社交環境。佢話呢啲公司聲稱自己促進資訊流通,實質幾近壟斷,佢哋利用喺平台徵集所得資訊,提供綑綁式服務,以歧視性定價去牟取暴利,損害市場經濟。
佢老人家仲話,呢啲設計方便易用嘅社交平台,令用家不斷為平台提供內容,公司利用資料與內容去賺大錢,但就拒絕為內容付費,亦唔會為平台內容負責或「上身」。
更甚嘅係,佢哋為達私下嘅商業目的,專登設計到啲平台令人上癮,就好似賭場引賭仔沉迷賭錢一樣。佢哋令平台使用者放棄自由意志,由公司營造注意點,令用者不知不覺間思維與行為受影響,阻礙創新,威脅思想自由。
索羅斯話尤其係數碼年代成長嘅年輕人,當失去自由意志,關注啲乜只操控喺幾間巨企手上,情況比奧威爾(George Orwell,《1984》作者)等筆下嘅極權世界更甚。
佢促請各方加強規管,話呢啲平台嘅老闆仲自以為係宇宙嘅主人,今次達沃斯論壇就最啱宣布佢哋「死期到」。
小記睇番,查實索羅斯自己早已身體力行掟貨,上季減持咗77%嘅Facebook持股,總值成1,870萬美元(約1.45億港元)㗎!
創客城市